Savjet za ljeto: Kako spasiti mobilni telefon od slane vode

Savjet za ljeto: Kako spasiti mobilni telefon od slane vode

I dok nama ne treba mnogo da budemo spremni za ljetne avanture, mobilni telefoni su sasvim druga priča, a upravo njih nosimo svuda kako bi zabilježili razne trenutke. To znači i da će se oni sa ovim toplim danima naći češće naći u prašini ili blizu vode - gdje im prijeti velika opasnost.

Mnogi od trenutnih top modela telefona na tržištu dolaze s oznakama da su vodootporni, ali to ne znači da s njima možete bez brige zaroniti u more ili bazen.

Kako biste znali na što je vaš telefon spreman, ključne su oznake IP67 ili IP68 koje su i najčešće na mobilnima. Prvi broj označava otpornost na prašinu i taj broj 6 je i najveći, odnosno ti su uređaji potpuno zaštićeni od prašine. Drugi broj veže se uz otpornost na tečnosti, a najviša oznaka može biti 9K (otpornost na mlazove vode visokog pritiska iz više smjerova). Broj 7 znači otpornost na uranjanje u vodu do metra dubine na pola sata, dok je 8 vezan za dubine veće od metra, ali proizvođač mora označiti dubinu.

No, ovo su oznake koje se odnose na slatku vodu, a u stvarnosti smo mnogo češće okruženi brojnim drugim tečnostima koje mogu imati drugačiji uticaj na zaptivače i vodonepropusne naljepnice koje u mobilnima štite slot za punjače, slušalice ili poklopce baterija. To znači i da hlorisana i slana voda mogu oštetiti i nagristi te djelove kroz koje može proći voda.

Neki proizvođači imaju telefone koji su spremni i na slanu vodu, poput CAT-a, koji se fokusirao na iznimno izdržljive telefone za razne profesionalce, pa tako za svoj novi uređaj S61 navode da je otporan i na slanu vodu.

Što kad je telefon već završio u vodi?

Izvadite ga brzo jer svaka sekunda povećava rizik od štete ili proboja vode prema spojevima. Ne uključujte ga (isključite ga ako je već uključen) i izvadite bateriju. Isušivanje uređaja fenom može biti izuzetno opasno, jer njegova toplina može oštetiti spojeve i ugurati vlagu dublje u uređaj. Ne duvajte u telefon jer možete napraviti istu stvar. Umjesto riže, dodatnu vlagu mnogo bolje će izvući silikonske kuglice koje se mogu kupiti i u većim pakovanjima, a ne samo u mini vrećicama kakve dolaze uz raznu elektroniku. U što god ga stavili, ostavite ga dan ili dva i pustite na miru. Ne pokušavajte ga uključivati.

Utapanje telefona u 96-postotni alkohol može biti od pomoći ako je telefon upao u more jer ćete na taj načini isprati so sa spojeva i smanjiti izglede oksidacije. Ako vam alkohol nije pri ruci, čim ste ‘upecali’ telefon iz mora isperite ga slatkom vodom da smanjite izglede za oštećenje tih slotova. U svakom slučaju, razmjere štete vidjeće se nakon temeljnog sušenja ili odlaska u servis koji može rastvoriti uređaj kako bi se vidjelo koliko su oksidirali djelovi telefona.

Nakon par dana sušenja u riži ili kuglicama, pokušajte uključiti telefon. Ako se baterija ne puni, a ne možete je izvaditi i pokušati promijeniti, moraćete u servis. Ako je telefon proradio, pratite kako se ponaša par dana i ima li nekih nepravilnosti u radu. Provjerite reaguje li ekran dobro na dodir i rade li zvučnici kako treba.

Uz ove gadžete bićete spremni za plažu

Kako biste dodatno zaštitili svoj telefon, mnoge firme prodaju nepropusne torbice za mobilne u kojima će telefon biti siguran, a možete ga i dalje koristiti. Po pravilu dolaze u univerzalnoj veličini. Sve što trebate napraviti jeste da ubacite telefon i zatvorite je. Mnoge od njih su i plutajuće kako telefon ne bi završio na dnu mora.

Dodatni nivo zaštite za vaš telefon može biti zaštitno kućište kakva nude razne firme. Nešto su skuplja od nepropusnih torbica, ali nude mnogo više mogućnosti i bolju zaštitu. Tako LifeProof nudi kućišta za razne telefone koja štite od vode, ali osiguravaju lagan pristup tipkama i štite kameru.

Nano premaz je tanki sloj hidrofobne tečnosti koja odbija vodu. Možete ga i sami postaviti, a ono što ćete dobiti nije zaštita od zarona, već zaštita kod svakodnevnog korištenja i otpornost na prolivanje vode, prskanje ili kišu.

Kvalitetnija verzija ove zaštite uključuje profesionalnu ugradnju uz vakuumsku komoru.


Izvor: magazini